საკონკურსო ნამუშევრების გამოფენა
მარტი 2, 2021
გამოფენა ახალციხის მუნიციპალიტეტის მერიის ორაგანიზებით თბილისის არქიტექტორთა და სკულპტორთა ასოციაციასთან აქტიური თანამშრომლობით მოეწყო. საექსპოზიციოდ წარმოდგენილი ნამუშევრები სახელმწიფო რწმუნებულმა ბესიკ ამირანაშვილმა, რწმუნებულის მოადგილემ შალვა ბერძენიშვილმა, ახალციხის მუნიციპალიტეტის მერმა ზაზა მელიქიძემ, კულტურისა და განათლების სამინისტროს, სამხარეო ადმინისტრაციის, მუნიციპალიტეტის მერიისაა და საკრებულოს, სამეცნიერო და სახელოვნებო წრეების წარმომადგენლებმა დაათვალიერეს.
გიორგი V ბრწყინვალე - დემეტრე II თავდადებულისა და ნათელა ჯაყელის ძეა, რომელიც სამცხეში, თავისი პაპის მანდატურთუხუცეს ბექა ჯაყელის კარზე იზრდებოდა. გიორგი ბრწყინვალეს მეფობის პერიოდში აღდგა საქართველოს ერთიანობა, განმტკიცდა სამეფო ხელისუფლება და აღორძინდა მონღოლთა ბატონობისგან დაქცეული ქვეყანა. სწორედ ამიტომ მადლიერმა შთამომავლობამ მას "ბრწყინვალე" უწოდა. გამომდინარე ზემოთთქმულიდან, საზოგადოებაში გაჩნდა იდეა და სურვილი, რომ სწორედ ახალციხეში განთავსებულიყო მეფე გიორგი ბრწყინვალეს ძეგლი. რაც შეეხება, სამშობლოსათვის თავდადებულ გმირთა მემორიალს, მისი მოწყობაც ასევე, ადგილობრივი მოსახლეობის მოთხოვნით გადაწყდა. გიორგი V ბრწყინვალეს ძეგლის ესკიზის შესარჩევად გამოცხადებული კონკურსის ფარგლებში 13 ნამუშევარი იქნა წარმოდგენილი, ხოლო „სამშობლოსათვის თავდადებულ გმირთა მემორიალის“ შესარჩევ კონკურსში 9 ესკიზი.
საკონკურსო ნამუშევრების გამოფენა 2 მარტიდან 10 მარტის ჩათვლით გაგრძელდა და მისი დათვალიერება ნებისმიერ მსურველს შეეძლო.
