'2021 წლის 15 - 19 ოქტომბერს თბილისის არქიტექტორთა და სკულპტორთა ასოციაციის ორგანიზებით მერაბ ბერძენიშვილის კულტურის საერთაშორისო ცენტრში 'მუზა' 'თანამედროვე ქართული ქანდაკების' გამოფენა მოეწყო, რომელიც მოქანდაკე მერაბ ბერძებიშვილის ხსოვნას მიეძღვნა.

გამოფენა პროექტის 'ქანდაკება კოვიდ 19 პანდემიის დროს, თანამედროვე ქანდაკების ფორუმი' ფარგლებში, საქართველოს კულტურის, სპორტისა და ახალგაზრდობის სამინისტროსა და თბილისის მერიის ფინანსური მხარდაჭერით განხორციელდა. გამოფენის თემა პანდემიის დროს შექმნილი ნამუშევრები იყო, რომლებიც წინასწარ გამოცხადებული კონკურსის გზით შეირჩა. მასში მონაწილეობა მიიღო საქართველოსა და მის ფარგლებს გარეთ მოღვაწე 50 მოქანდაკემ.

აღსანიშნავია, რომ ბოლო ათწლეულების მანძილზე მოქანდაკეთა და დარგის სხვა წარმომადგენლების დიდი სურვილისა და არაერთი მცდელობის მიუხედავად მსგავსი მასშტაბის გამოფენა არ გამართულა, რაც კიდევ უფრო ზრდის მის მნიშვნელოვნებას. გამოფენაზე თავმოყრილი ნამუშევრები მრავალფეროვანი მასალის გაცნობის შესაძლებლობას აძლევდა მნახველს. წარმოდგენილი იყო სხვადასხვა თაობის მხატვართა მიერ შესრულებული არაერთი საინტერესო ქანდაკება.

საექსპოზიციო მასალის საფუძველზე მკვლევართათვის, ხელოვანებისთვის და ზოგადად საზოგადოებისთვის თვალნათელი გახდა, რომ ქართული ქანდაკების განვითარების პროცესი უწყვეტია და პროფესიულად იგი მაღალ დონეს ინარჩუნებს.