ივლისი13-31, 2022
A პროექტი „უახლესი პერიოდის ქართველ მოქანდაკეთა გამოფენების ციკლი - „სამი თაობა“ თბილისის არქიტექტორთა და სკულპტორთა ასოციაციამ, თბილისის მერიის ფინანსური მხატდაჭერით განახორციელა (პროექტის ხელმძღვანელი: ლევან სალუქვაძე).
პროექტის მიზანს თანამედროვე ქართული ქანდაკების ხელშეწყობა-პოპულარიზაცია წარმოადგენდა და მის ფარგლებში მერაბ ბერძენიშვილის კულტურის საერთაშორისო ცენტრში „მუზა“ 2022 წლის 13 ივლისიდან 31 ივლისის ჩათვლით, უახლესი პერიოდის ქართველ მოქანდაკეთა სამი გამოფენა მოეწყო: 1990-იანელები; 2000-იანელები; 2010-იანელები.
ექსპოზიციები დაეთმო თბილისის სახელმწიფო სამხატვრო აკადემიის კურსდამთავრებული ბოლო სამი თაობის პროფესიონალი მოქანდაკეების ნამუშევრებს ცალ-ცალკე. მასში მონაწილეობა საქართველოსა და მის ფარგლებს გარეთ მოღვაწე 50 ხელოვანმა მიიღო და წარმოდგენილი იყო 70 სკულპტურული კომპოზიცია.
გამოფენების დასრულების შემდეგ გაიმართება საჯარო ლექცია, რომელზეც შეჯამდა ღონისძიებები. საუბარი შეეხო ქანდაკებაში არსებულ თანამედროვე მხატვრულ ტენდენციებს. ამ მიმართულებით საქართველოში მიმდინარე პროცესებს და იმ სირთულეებს, რასაც დღევანდელობა სახავს ავტორთა წინაშე.
პროექტი თბილისის სახელმწიფო სამხატვრო აკადემიის 100 წლის იუბილეს მიეძღვნა და მას პარტნიორობას უწევდნენ თბილისის სახელმწიფო სამხატვრო აკადემია და გიორგი ჩუბინაშვილის სახელობის ქართული ხელოვნების, ისტორიისა და ძეგლთა დაცვის ეროვნული კვლევითი ცენტრი.
