ოქტომბერი 15-18, 2024

'ქანდაკების ფესტივალი 2024'-ის მეორე ეტაპის ერთ-ერთი მნიშვნელოვანი ღონისძიება ქანდაკების II სტუდენტური სიმპოზიუმი იყო. 2024 წლის 15 ოქტომბერს, მერაბ ბერძენიშვილის სახელობის საერთაშორისო კულტურის ცენტრმა 'მუზა' სიმპოზიუმის ფარგლებში შექმნილი ნამუშევრების გამოფენას უმასპინძლა.

წელს სიმპოზიუმი ორი თვის განმავლობაში მიმდინარეობდა და მასში სხვადასხვა უმაღლესი სასწავლებლის, სახელოვნებო მიმართულების სტუდენტებმა მიიღეს მონაწილეობა. სიმპოზიუმის თემა იყო – 'ინოვაციური სკულპტურული პროექტები ქალაქ თბილისისთვის'. ღონისძიების ფარგლებში სტუდენტმა: მოქანდაკეებმა, არქიტექტორებმა და ხელოვნებათმცოდნეებმა ერთობლივი თანამშრომლობით 6 პროექტი განახორციელეს.

მონაწილეებმა ქალაქ თბილისში წინასწარ შერჩეული ადგილებისთვის სკულპტურული ესკიზები, არქიტექტურული რენდერები და სახელოვნებათმცოდნეო რეცენზიები მოამზადეს, რომლებიც თანამედროვე ურბანული სივრცის მოთხოვნებს პასუხობდა. გამოფენამ დამთვალიერებლებს საშუალება მისცა უშუალოდ გაცნობოდნენ ამ პროექტებს, ხოლო QR კოდების მეშვეობით შესაძლებელი იყო მათი ვირტუალური ვერსიების დათვალიერებაც სტუდენტების მიერ შერჩეულ ლოკაციებზე, რაც ღონისძიებას დამატებით ციფრულ განზომილებას სძენდა.

ინტერდისციპლინური ჯგუფების მუშაობის ფორმატმა ხელი შეუწყო ქანდაკებისა და არქიტექტურის ურთიერთმიმართების გააზრებას, თანამედროვე ურბანული ქანდაკების ტენდენციების გამოვლენას და შემოქმედებითი გამოწვევების ანალიზს.

ღონისძიებას ესწრებოდნენ საქართველოს კულტურისა და სპორტის სამინისტროს, თბილისის მერიის, სხვადასხვა ორგანიზაციის წარმომადგენლები, ასევე მოქანდაკეები, ხელოვნებათმცოდნეები, სტუდენტები და სახელოვნებო სფეროს სხვა პროფესიონალები.